Ինչքանով են իրատեսական Ի.Ալիևի հայտարարած ադրբեջանական գազի ծավալները, դժվար է կարծիք հայտնել, քանզի այն արվել է անմիջապես այն բանից հետո, երբ «Ռոյթերս» լրատվական գործակալությանը տված հարցազրույցում «Նաբուկո» ծրագրի ղեկավար, ավստրիացի Վերներ Աուլին կասկածանք է հայտնել խողովակաշարի կառուցման նպատակահարմարության հարցում, քանի դեռ ապահովված չեն գազի անհրաժեշտ ծավալները:
«Ամեն ինչ պարզ է, եթե գազ արտահանողների բավարար քանակություն չապահովվի (ներկայումս հավաքվում են արտահանող ընկերությունների հայտարարագրերը), ապա Նաբուկոն չի կառուցվի: Մենք առևտրական ձեռնարկություն ենք, այլ ոչ թե հասարակական կազմակերպություն: Չկան հայտարարագրեր` չի լինի գազատար»,- հայտարարել է Աուլին:
Նշենք, որ 7,9 միլիարդ եվրո արժողությամբ և տարեկան 31 միլիարդ խ.մ. գազի փոխադրման համար նախատեսված խողովակաշարի շինարարական աշխատանքներին, հավասար քվոտաներով, մասնակցում են Թուրքիայի, Ավստրիայի, Գերմանիայի, Բուլղարիայի, Հունգարիայի և Ռումինիայի ընկերությունները: Շինարարությունը սկսվելու է 2011 թվին, իսկ գործարկումը նախատեսված է 2014 թվին:
