Սփյուռքի նախարար Հրանուշ Հակոբյանը հունվարի 28-ից փետրվարի 6-ը աշխատանքային այցով կմեկնի Ամերիկայի Միացյալ Նահանգներ և Կանադա: Այցի ընթացքում նախարարը կլինի Լոս Անջելեսում, Կոստա Մեսայում, Ֆրեզնոյում, Սան Ֆրանցիսկոյում և Տորոնտոյում:
Ինրպես հայտնում են Սփյուռքի նախարարությունից, այսօր 28-ին Հ.Հակոբյանը կմասնակցի Գլենդելում ՀՀ գլխավոր հյուպատոսության կողմից կազմակերպված` Հայոց բանակի օրվան նվիրված միջոցառմանը:
Հաջորդ օրը նախարարը կհանդիպի Հայ Առաքելական Եկեղեցու Արևմտյան Ամերիկայի թեմի առաջնորդ Հովնան Արքեպիսկոպոս Տերտերյանին, այնուհետև Գլենդելում ՀՀ գլխավոր հյուպատոսությունում կանցկացնի աշխատանքային խորհրդակցություն` գաղութի ընդհանուր վիճակի և 2011թ. նախատեսված ծրագրերի վերաբերյալ: Նույն օրը Հ.Հակոբյանը կհանդիպի նաև ՀԲԸՄ Կալիֆորնիայի մասնաճյուղի ներկայացուցիչների:
Հունվարի 30-ին Կոստա Մեսա քաղաքում նախարար Հ.Հակոբյանը կմասնակցի թեմի 25-ամյակին նվիրված միջոցառումներին, կհանդիպի Օրինջ Քաունթիի հայ համայնքի ներկայացուցիչներին:
Այցի ընթացքում նախարարը հանդիպումներ կունենա հայ ավանդական կուսակցությունների, Հայ կանանց միջազգային կազմակերպության, համայնքի մասնագիտական կազմակերպությունների, քաղաքային իշխանությունների և եկեղեցու ներկայացուցիչների հետ, կայցելի Թոմաս Ջեֆերսոնի անվան հանրային դպրոց, «Արարատ Տուն» ծերանոց, Սողոմոն Թեհլերյանի գերեզման և Վիլիամ Սարոյանի թանգարան:
Սան Ֆրանցիսկոյում Հ.Հակոբյանը հանդիպումներ կունենա հայ համայնքի ներկայացուցիչների, բարձր տեխնոլոգիաների ոլորտում ակտիվ հայ գործարարների և երիտասարդ մասնագետների հետ: Տորոնտոյում նախարարը կհանդիպի հայկական կազմակերպությունների ներկայացուցիչներին:
/Aysor.am/
| 
