Ադրբեջանական կողմը վստահ չէ, թե Լեռնային Ղարաբաղի հիմնախնդիրը կարող է լուծվել ռազմական ճանապարհով, և դրա երաշխիքը Հայկական բանակն է: Այս մասին Հայկական բանակի 19-ամյակի կապակցությամբ այսօր ասուլիսի ժամանակ հայտարարեց քաղաքագետ Ալեքսանդր Մանասյանը:
«Ղարաբաղյան ազատամարտում մենք տարել ենք ոգու հաղթանակ: Իհարկե, կարևոր է, որ զենքի հաղթանակ տանենք, բայց պակաս կարևոր չէ, որ զինվորն ունի ոգու հաղթանակ: Կարևորը նաև այն է, որ մենք մեր գաղափարական առումով ճիշտ շեշտադրենք ուժի գործոնի դերը: Ոչ միայն ես, այլև փորձագետները գտնում են, որ մեր բանակը տարածաշրջանի ամենահզոր բանակն է: Այդ խրամատներում կռվող զինվորը մեր հոգևոր աջակցության, մեր սատարման կարիքն ունի»,- ասաց բանախոսը:
Ըստ քաղաքագետի` հայության բոլոր պատմական հաջողությունները կապված են եղել իր զինուժի հետ: Նա նշեց, որ Հայաստանի անկախացման առաջին իսկ օրվանից հայկական զինված ուժերն էին, որ հնարավորություն էին տալիս դիմակայել մարտահրավերներին:
«Պատմությունը հաստատել է այս իրողությունը. ազգի, ժողովրդի գոյության գլխավոր գրավականներից մեկը հենց զինված ուժերն են: Բանակում ընդհանրական ձևով արտացոլվում է ազգի ողջ ընդունակությունը: Երբ մենք հռչակել ենք անկախ պետականություն, հենց անմիջապես դրանից հետո մենք դիմակայել ենք ռազմական ճնշմանը: Մենք գլխովին ջախջախել ենք ադրբեջանական բանակին:
Պատմական այս փաստը ցույց է տալիս, թե որքան կարևոր է ամենավտանգավոր հատվածներում հենց ուժի առկայությունը»,- նշեց նա:
/Aysor.am/
