ԵՐԵՎԱՆ, 25 հունվարի. /Նովոստի-Արմենիա/. ԵԱՀԿ Մինսկի խմբի իրական խնդիրը ղարաբաղյան հակամարտության կողմերի միջև խողովակի պահպանումն է, կարծում է Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Նրա խոսքերով՝ համաշխարհային փորձը ցույց է տալիս, որ հակամարտությունների հետ կապված իրավիճակը, որոնցում կողմերի միջև խողովակ կա, ավելի դրական է զարգացել:
Իսկանդարյանի խոսքերով՝ ԵԱՀԿ ՄԽ-ի երկրորդ խնդիրը գործընթացի միջազգայնացումն է, «որպեսզի հայերն ու ադրբեջանցիները չլինեն միայնակ, այլ լինեն նվազագույնը ֆրանսիացիների, ռուսների և ամերիկացիների հետ»:
«Եվ այս խնդիրը Մինսկի գործընթացը կատարում է արդեն ավելի քան 18 տարի: Լավ է կատարում՝ հայտնի խնդիրներով, սակայն այս փոխգործակցությունը շարունակվում է, ընդ որում ժամանակի ընթացքում գործընթացն անցել է մի քանի շատ խոշոր ճգնաժամերի միջով», - ասաց նա երեքշաբթի «Նովոստի» միջազգային մամուլի կենտրոնում տեղի ունեցած «Լեռնային Ղարաբաղի հակամարտության կարգավորումը: Եռակողմ հանդիպման արդյունքները» թեմայով Երևան-Մոսկվա տեսակամուրջի ընթացքում:
Միաժամանակ քաղաքագետը կարծում է, որ Ռուսաստանը հնգօրյա պատերազմից և 2008 թ.-ին Ղարաբաղի մասին մայնդորֆյան հռչակագրի ստորագրումից հետո իր վրա բանակցողի բավականին լուրջ դեր է վերցրել:
«Իմ կարծիքով՝ բանակցային գործընթացի ողջ պատմության ընթացքում առաջին անգամ է, որ նման բան է արվում, ամենայն հավանականությամբ, մյուս համանախագահների քարտ-բլանշով», - ասաց նա:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
/Newsarmenia.am/
| 
