«Մինչ ՀՀ նախագահի Կիպրոս կատարած այցը, երկու երկրների քաղաքական, մշակութային հարաբերությունները բարձր մակարդակում էին, սակայն նախագահի պետական այցը Կիպրոս դրական առումով նոր որակի վրա դրեց հայ-կիպրական հարաբերությունները, ինչի վառ ապացույցը նախագահների ասուլիսի ընթացքում հնչած գնահատականներն էին և Եմ անդամ Կիպրոսի ու Հայաստանի միջև ստորագրված հռչակագիրը»,- անդրադառնալով ՀՀ նախագահի Կիպրոս կատարած այցին՝ Panorama.am-ին հայտարարեց ԱԺ պատգամավոր, ՀՀԿ խմբակցության քարտուղար Էդուարդ Շարմազանովը:
Պատգամավորն այդ հռչակագրից մի քանի կետ առանձնացրեց. «Նախ Հայաստանն առաջին անգամ է ԵՄ անդամ պետության հետ նմանատիպ հռչակագիր կնքում, իսկ դրանում Կիպրոսն իր զինակցությունն է հայտնում Հայաստանի նախաձեռնություններին, մասնավորապես Արցախի հարցի լուծմանը: Խոսելով երեք սկզբունքների մասին, Կիպրոսը շեշտը դնում է Արցախի ժողովրդի ինքնորոշման իրավունքի իրացման վրա: Այսինքն՝ ԵՄ անդամ հանդիսացող Կիպրոսի Հանրապետությունը Արցախի հարցի լուծում տեսնում է՝ ապավինելով ինքնորոշման իրավունքի իրացմանը:
Եվ սա այն դեպքում, որ Կիպրոսն ինքն ունի հարց Թուրքիայի հետ՝ կապված իր հողերի բռնազավթման հետ ու այդ հարցում նա ապավինում է տարածքային ամբողջականության սկզբունքին: Սակայն դա չի խանգարում Կիպրոսին, որպեսզի ԼՂ հարցում Կիպրոսը պաշտպանի ժողովուրդների ինքնորոշման իրավունքը: Սա շատ կարևոր է, քանի որ այն նորույթ է մեր դիվանագիտության մեջ և հենց այստեղ է, որ մենք տեսնում ենք նախագահ Սարգսյանի հետևողական քայլերի հաջորդականությունը և դրանց արդյունքները»,- ասաց պատգամավոր:
Երկրորդ կարևոր հանգամանքը, որը քաղաքական հռչակագրում առանձնացրեց խորհրդարանականը՝ այն է, որ Կիպրոսն անդրադարձ կատարելով հայ-թուրքական հարաբերություններին՝ հայտարարում է, որ պրոցեսը մտել է փակուղի հենց Թուրքիայի պատճառով: «Սա կարևոր է հատկապես այն առումով, որ ԵՄ անդամ երկիրը քննադատում է ԵՄ ձգտող Թուրքիայի ուլտիմատումների, շանտաժի քաղաքականությունը: Սա նոր որակի հարաբերություններ է ԵՄ-Հայաստան քաղաքականությունում»,- ասաց պրն. Շարմազանովը:
Նրա խոսքերով՝ այդ հռչակագրով, Հայաստանն իր հերթին զորակցություն է հայտնում Կիպրոսին՝ Կիպրական հարցի լուծման ուղղությամբ ու իր անհամաձայնությունն է հայտնում կիպրոսի հողերի բռնազավթմանը՝ գտնելով, որ Թուրքիայի՝ Կիպրոսը մաս-մաս անելու ծրագիրը պետք է դատապարտվի միջազգային հանրության կողմից:
/Panorama.am/
|