Ադրբեջանցի զինծառայողները Աղստաֆինի շրջանի բենզալցակայաններից մեկի վրա զինված հարձակում են իրականացրել: Այս մասին, հղում անելով շրջանային ոստիկանական բաժանմունքին, հաղորդում է «ԱՊԱ» լրատվական գործակալությունը:
Ոստիկանությունից նաև տեղեկացրել են, որ դեպքը կատարվել է հունվարի 9-ի լույս 10-ի գիշերը: Պարզվում է, որ ադրբեջանցի զինծառայողները մուտք են գործել բենզալցակայանի տարածք, հրազենային զենքից կրակ բացելով սպանել աշխատակցին՝ Մամեդ Մամեդովին, և փախել դեպքի վայրից:
Իրականացված օպերատիվ միջոցառումների շնորհիվ պարզվել է հանցագործություն կատարած զինծառայողների անունները: Մեղադրյալները՝ Ազիզ Ալիևը, Սենան Մեխտիևը և Սալեխ Ասկերովը ձերբակալվել են:
Վերջիններս իրենց նախնական ցուցմունքում նշել են, որ զինված հարձակում իրականացրել են գումար հափշտակելու նպատակով, սակայն բենզալցակայանի աշխատակիցը դիմադրել է և իրենք ստիպված են եղել սպանել նրան: Հանցագործներից մեկը՝ Սենան Մեխտիևը ևս հրազենային վիրավորում է ստացել:
Նշյալ փաստի առնչությամբ քրեական գործ է հարուցվել Ադրբեջանի քրեական օրենսգրքի 120.1 (դիտավորյալ սպանութուն) հոդվածով:
/Panorama.am/
| 
