Որոշ քաղաքագետների կարծիքով, Ադրբեջանի իշխանությունը ներկայումս իր ամենահզոր ժամանակաշրջանն է ապրում: Սակայն որոշ պնդումներ էլ կան, որ իշխանության հզորության գագաթնակետում գտնվելը միայն թվացյալ է, քանի որ նման պահերին կարող են անակնկալ տապալումներ լինել:
Ինչպես հայտնում է «Ենի Մուսավաթ» թերթը, «Մուսավաթ» կուսակցության անդամ, նախկին պատգամավոր Պանահ Հուսեյնի կարծիքով, իշխանությունը բոլորովին էլ ուժեղ չէ: «Ադրբեջանում պաշտոնյա-օլիգարխ վարչախումբ է ձեւավորվել: Նման վարչախմբերն իրենց ներսում հակասություններ են պարունակում և չեն կարող երկար կյանք ունենալ, որովհետեւ զուրկ են ներքին կայունությունն ամրապնդող սոցիալական, գաղափարական, հոգեբանական գործոններից:
Ներկայիս վարչարարությունից դժգոհ է նույնիսկ իշխանության տարբեր մակարդակներում ներկայացված պաշտոնյաների մեծամասնությունը: Իշխանության` միջազգային հանրության հետ հարաբերությունները նույնպես արագորեն վատանում են: Ստեղծված իրավիճակը ոչ մի լավ հեռանկար չի խոստանում իշխանության համար: Բավական իրատեսական է շատերի չսպասած անակնկալ փոփոխությունների հնարավորությունն Ադրբեջանում»,- ասել է նա` թերթի թղթակցի հետ զրույցում:
«Մուսավաթ» կուսակցության գործադիր մարմնի ղեկավար Արիֆ Հաջըլըն նույնպես կարծում է, որ Ադրբեջանի իշխանությունը փլուզվելու վտանգի առաջ է: «Իր վարած քաղաքականության արդյունքում Ադրբեջանի իշխանությունը լուրջ ճեղքվածք է ստեղծել հասարակության 95 տոկոսի և իր միջեւ: Իշխանությունը հեռացել է ժողովրդից և հասարակությունից: Նա իր շուրջը լուրջ վակուում է ստեղծել: Նման իրավիճակը բոլոր իշխանությունների համար միշտ էլ անհաջող ավարտ է ունեցել»,- համոզմունք է հայտնել մուսավաթական գործիչը:
/Panorama.am/
| 
