Այսօր հրավիրված ընդլայնված խորհրդակցության ընթացքում «ՀայՌուսգազարդ» ՓԲԸ գլխավոր տնօրենի ժամանակավոր պաշտոնակատար Վարդան Հարությունյանը ընկերության ստորաբաժանումներին հանձնարարեց ամփոփել 2010 թ. կատարված աշխատանքները և հաշվետվություններ պատրաստել դրանց վերաբերյալ, մասնավորապես ֆինանսատնտեսական ցուցանիշների, գազաֆիկացման, ազդանշանային սարքավորումների տեղադրման և այլ ծրագրերի ուղղությամբ:
Ընկերության մամլո ծառայության փոխանցմամբ, հանձնարարվեց նաև ներկայացնել 2011 թ. ծրագրերը և համապատասխան քննարկումներ կազմակերպել նախատեսվող նախագծերի շուրջ:
Հատուկ ուշադրություն հրավիրվեց ֆինանսական կարգապահության և ծախսերի օպտիմալացման հարցերին, ինչպես նաև կորուստների նվազեցման ուղղությամբ տարվող միջոցառումներին:
Վարդան Հարությունյանն ընդգծեց, որ 2011 թ. ընկերության համար առանձնանալու է հատկապես Հրազդանի ՋԷԿ-ի 5-րդ էներգաբլոկի շինարարության ավարտով: Բլոկի թողարկումը նախատեսվում է առաջին եռամսյակում, ինչն արդեն փաստում է էլեկտրաէներգիայի արտադրության ծավալների մասին: Այս մասշտաբային ներդրումային ծրագիրը լիարժեք դարձնելու և ռազմավարական նպատակին ծառայեցնելու համար, Վ. Հարությունյանը կարևորեց հենց այսօրվանից ուսումնասիրել էլեկտաէներգիայի արտահանման շուկաների հարցը:
Անդրադառնալով կարգապահական խնդիրներին, Վ. Հարությունյանը նշեց, որ ընթացիկ տարում համալիր աշխատանքներ պետք է տարվեն սպասարկաման որակի բարձրացման ուղղությամբ:
/Aysor.am/
| 
