Մինչեւ խորհրդային կարգերը Արցախի Շուշի քաղաքում բնակչության թիվը տարբեր ժամանակներում տարբեր է եղել, երբեմն հասել է մինչեւ վաթսուն հազարի: Խորհրդային կարգերից հետո ադրբեջանցիներն այստեղ շատացան ու գերակշիռ մաս կազմեցին` 30%-ը հայեր էին, 70%-ը` ադրբեջանցիներ:
Հիմա քաղաքն ունի մոտ չորս հազար բնակիչ. կարեւորը` բոլորը հայեր են: Հրադադրից տասնյոթ տարի անց ավերված, այրված Շուշին վերականգնվում է ու ապրում է բնականոն կյանքով:
«Շուշիից հեռացողների մասին չգիտեմ, բայց եկողները շատ են. գալիս են տարբեր տեղերից, գալիս են արմատներով արցախցիներ, որ իրենց երեխաներն էլ սիրեն այս հողն ու այստեղ ապրեն», Times.am –ի թղթակցի հետ զրույցում նշեց Շուշիի Սբ. Ամենափրկիչ (Ղազանչեցոց) եկեղեցու քահանա Տեր Անդրեաս Թավադյանը:
Շուշիում այսօր կենսական անհրաժեշտության շատ կառույցներ են վերանորոգվում: Խ. Աբովյանի անվան դպրոցը սեպտեմբերից կսկսի գործել: Վերանորոգվում է նաեւ օրիորդաց դպրոցը: Կառուցվում է դատարանի շենքը, եւ վերականգնումից հետո Ստեփանակերտից ողջ դատական համակարգը կտեղափոխվի Շուշի: Քաղաքում լուծվում է ջրամատակարարման խնդիրը: Կառուցվում է մարզադաշտ, գրադարան:
Շուշիում մշակելու հող չկա, անասնապահությունն էլ արգելված է: Բնակչության զբաղվածության հարցը հիմնականում լուծվում է քաղ. հիմնարկներում` դպրոց, ոստիկանություն..: Հակաօդային պաշտպանության զորամասը բավականին շատ մարդ բերեց Շուշի, ովքեր շենքեր վերանորոգեցին եւ սկսեցին ապրել այստեղ:
«Սբ. Ամենափրկիչ եկեղեցում ամուսնանում է տարեկան շուրջ ութսուն-իննսուն զույգ», նշեց Տեր Անդրեաս Թավադյանը: Պատասխանելով որեւէ տարածք ադրբեջանցիներին հանձնելու հնարավորության մասին, քահանան ասաց. «Անգամ չեմ ցանկանում այդ մասին խոսել: Ի՞նչ հանձնելու մասին է խոսքը. ու՞մ հանձնել, ու՞մ հողը հանձնել: Սա մեր երկիրն է ու մենք ենք ապրել այստեղ դարեր շարունակ»:
Ազգային անվտանգության կարեւորությունն Արցախում լավ են հասկանում: «Արցախում գրանցված աղանդներ ընդհանրապես չկան: Աղանդները տարածված չեն նաեւ ժողովրդի շրջանում: Պետությունն աղանդներին չի գրանցում ու վերջ. սա ռազմական գոտի է, եւ աղանդների ներկայությունն այստեղ շատ վտանգավոր է: Բնակչության վերաբերմունքն էլ շատ բացասական է. բնակչությունն այդքան զոհ է տվել, եւ ահա այսօր աղանդավորները փորձում են բանակից ետ պահել այն զինվորին, ով ծնվել է հերոսից: Սա աբսուրդ է, այսպիսի բան լինել չի կարող: Ոչ ոք նրանց չի ընդունում: Անգամ նրանք, ովքեր ժամանակին անգիտակցաբար ընկել են աղանդավորների ազդեցության տակ, այժմ գիտակցելով վտանգը, հետ են կանգնում», հավաստիացրեց Տեր Անդրեասը:
Շուշին վերականգնվում է, վերակառուցվում է ու շարունակում է ապրել:
/Times.am/
|