Հիշեցնենք, որ հունիսի 18-ին ադրբեջանական դիվերսիոն խմբի հարձակման ու հայ և ադրբեջանցի զինվորների միջև տեղի ունեցած մերձամարտի հետևանքով զոհվել էր չորս հայ զինվոր, ևս չորսը վիրավորվել էին:
ՀՀ ԱԳՆ ղեկավարն ասաց, որ Ադրբեջանի ռազմատենչ հայտարարություններն ու հրադադարի ռեժիմի խախտումները չխրախուսելու համար հարկ է «անուններով խոսել» ու հստակ ասել, թե ով է պատասխանատու միջադեպի համար:
«Որպեսզի չխրախուսել ռազմատենչ հայտարարություններ անողներին, հրադադարի ամրապնդման առաջարկությունը մերժողներին և հրադադարի պայմանավորվածության կոպիտ խախտողներին, որպեսզի չխրախուսել նրանց, ովքեր հրաժարվում են շփման գծից դիպուկահարներին դուրս բերել, որպեսզի չխրախուսել նրանց, ովքեր սադրանքներ են կազմակերպում ու բացահայտ ձևով փորձեր են կատարում ձախողել բանակցությունները, ավելի ճիշտ է անուններով խոսել ու ասել, թե ով է պատասխանատու»,- ասաց նախարարը:
Ըստ` Է.Նալբանդյանի, հայտարարության հեղինակները հատկապես վերջին դեպքերից հետո ասում են, որ բոլորի համար էլ պարզ է, թե ում են ուղղված այդ հայտարարությունները, քանի որ Հայաստանը չէ, որ ռազմատենչ հայտարարություններ է անում, Հայաստանը չէ, որ հրաժարվել է դիպուկահարների դուրս բերումից, ԵԱՀԿ կողմից առաջարկված հրադադարի ամրապնդման առաջարկից:
«Այսինքն, այս հայտարարություններն ու կոչերն առաջին հերթին ուղղված են Ադրբեջանին, և դրանք կարող են «դեղին քարտ» լինել Ադրբեջանի համար»,-ասաց նախարարը, նկատելով, որ Ադրբեջանը ցանականում է ԼՂ խնդրին կրոնական բնույթ տալ ու «իր ավանտյուրաներում ներքաշել իսլամական աշխարհին, ինչը շատ վտանագվոր է»:
«Այդ իմաստով կարծում եմ, որ հստակ դիրքորոշում պետք է արտահայտվի միջազգային հանրության կողմից, որպեսզի ոչ միայն չխրախուսվի, այլև Ադրբեջանի մոտ տպավորություն ստեղծվի, որ միջազգային հանրությունը կարող է թույլ տալ կամ ըմբռնումով մոտենալ որևէ կարգի ոտնձգությունների, ռազմատենչ մոտեցումների ու հայտարարությունների»,- նշեց Էդվարդ Նալբանդյանը:
/Aysor.am/
