Ոչ ոք այլևս չի զարմանում մի քանի երեխայի հոր, նոր ընտանիք կազմած հարսի կամ ուսանողի, նույնիսկ միջնակարգ դպրոցի աշակերտի ինքնասպան լինելուց: Թեև պաշտոնական վիճակագրությունը խոում է ինքնասպանության դիմողների մեծասմանության հոգեկան հիվանդ լինելու մասին, սակայն, իրականությունը բոլորովին այլ է, քանի որ Ադրբեջանում ինքնասպան եղած մարդկանց մեծամասնությունը անօրինականությունների և կամայականությունների հանդիպած մարդիկ են:
«Ազադլըգ»-ը գրել է, որ հոգեբանները դա բացատրում են երկրում առկա սոցիալական վատ վիճակի պատճառով առաջացող սթրեսով և փորձել պարզել, թե ինչ կարծիքի են քաղաքական գործիչները: «Մուսավաթ» կուսակցության գործիչ Արիֆ Հաջըլըի կարծիքով, Ադրբեջանում լարված քաղաքական մթնոլորտը, անօրինականության աննախադեպ աճը անելանելիության կոմպլեքս է ստեղծել հասարակության մեջ: Ինքնասպանությունների աճը բացատրելով դրանով` Ա.Հաջըլըն ընդգծել է, որ հասարակության հավատի կորուստն ու անվստահությունը զրոյի են հավասարեցրել հասարակության ինքնակարգավորման գործընթացը:
«Այդ պատճառով, ապագայի նկատմամբ հույսը կորցրած մարդիկ չեն հավատում իրավիճակի՝ դեպի լավը փոխվելու հնարավորությանը: Ինքնասպանությունների աճի պատճառը դրա արդյունքում ստեղծված հոգեկան հակումն է», -ասել է Ա.Հաջըլըն: Ադրբեջանի ժողճակատ կուսակցության փոխնախագահ Նուրեդդին Մեմմեդլիի խոսքերով` վերջին շրջանում ինքնասպանությունների դինամիկայի խիստ աճը Ադրբեջանում առկա իրավիճակի պարզ նմուշն է: «Սովորաբար, մարդիկ ինքնասպանության են դիմում ամեն ինչի նկատմամբ հույսը կորցնելու ժամանակ:
Դրա դրդապատճառները տարբեր են, բայց գերիշխողը, հատկապես, հոգեբանական վիճակն է: «Երկրի ղեկավարությունը գործում է՝ ելնելով միայն սեփական շահերից: Ամեն ինչի նկատմամբ հույսն ու հավատը կորցրած մարդիկ հարկադրված ինքնասպանության են դիմում», -ասել է Ն.Մեմմեդլին: Ադրբեջանի դեմոկրատական կուսակցության առաջնորդ Սարդար Ջալալօղլուի կարծիքով էլ Ադրբեջանում առկա սոցիալական նեգատիվ իրավիճակի պատճառը ադրբեջանական հասարակության անկազմակերպ լինելն է:
«Ադրբեջանի կառավարման գործում առկա վիթխարի թերությունների պատճառով, մարդիկ չեն կարողանում որևէ օգնություն ստանալ պաշտոնական պետական կառույցներից և մնում անպաշտպան, ինչն էլ դառնում է նրանց կյանքից հեռանալու պատճառը», -եզրահանգել է Ս.Ջալալօղլուն:
