Ադրբեջանի անշարժ գույքի կոմիտեի ղեկավար Քերեմ Հասանովն իր կոռուպցիոն գործողությունները կյանքի է կոչում պետության ղեկավար Իլհամ Ալիևի անվան տակ: Կոմիտեի ղեկավարը հաճախակի իր մոտ շրջապատին ասում է, որ Իլհամ Ալիևի հետ ընկերական հարաբերություններ ունի և միակ պաշտոնյան է, որ ամեն շաբաթ այցելում է պետության ղեկավարի ամառանոց:
Ինչպես հաղորդում է «Ենի մուսավաթ» թերթը, Իլհամ Ալիևի հետ հանդիպումներին Քերեմ Հասանովը պետության ղեկավարի ուշադրությանն է հասցնում տարբեր պաշտոնյաների մասին իր հավաքած «տեղեկատվությունը»: Պետության ղեկավարն էլ, ուրախությամբ լսելով այդ տեղեկատվությունը, նոր հանձնարարություններ է տալիս նրան: Կոմիտեի ղեկավարի խոսքերով, Իլհամ Ալիևը իրեն ասել է. «Ոչ մի բանից մի քաշվի, ինչ ուզում ես արա, ես քո թիկունքին կանգնած եմ»: Կոմիտեի ղեկավարն իր մոտ շրջապատին ասել է նաև, որ սեփականաշնորհման հարցում չխուսափեն դատարանից, քանի որ Իլհամ Ալիևը Գերագույն դատարանի նախագահ Ռամիզ Ռզաևին «հանձնարարել է դատարանի որոշումները կայացնել Քերեմ Հասանովի օգտին»:
«Չենք կարող ասել, թե ինչքանով են ճշմարտացի կոմիտեի ղեկավարի ասածները, բայց փաստերը ցույց են տալիս, որ այսօր Քերեմ Հասանովն անում է իր ցանկացածը և դատարաններն էլ որպես կանոն որոշումներն ընդունում են նրա ցանկություններին համապատասխան»,- հայտնել է «Ենի մուսավաթ»-ը:
|
