Ադրբեջանական «Բիզիմ յոլ»-ը հայտնել է, որ ադրբեջանական պատվիրակությունն Անկարայում հանդիպել է Թուրքիայի արտաքին գործերի նախարար Ահմեդ Դավութօղլուի, խորհրդարանի արտաքին հարաբերությունների հանձնաժողովի նախագահ Մուրադ Մերջանի, Թուրքիայի վարչապետ Թայիփ Էրդողանի հետ: Հանդիպումների հիմնական թեման եղել է հայ-թուրքական արձանագրությունների, Լեռնային Ղարաբաղի հակամարտության և տարբեր երկրների կողմից Հայոց ցեղասպանության ճանաչման հետ կապված հարցերը:
Բաքվի աղբյուրները Մեհդիևի այցի նպատակի վերաբերյալ տեղեկություն չեն հայտնում, սակայն, միանգամայն հստակ է, որ Էրդողանի` ԱՄՆ կատարելիք այցի շրջանակում Բաքուն ջանում է ընդհանուր լեզու գտնել Անկարայի հետ: Վերջին շրջանում Բաքվի հարաբերությունները սառել են և Անկարայի, և Վաշինգտոնի հետ: Հայաստան-Թուրքիա երկկողմ հարաբերությունների նորմալացման մասին արձանագրությունների ստորագրման հետ կապված աշխարհաքաղաքական իրավիճակի զարգացումը կտրուկ կերպով թուլացրել է տարածաշրջանում Բաքվի դիրքը:
Ղարաբաղի խնդրի կարգավորման հարցում ամբողջությամբ մենակ չմնալու համար, իրավիճակը ստիպում է Ադրբեջանի իշխանությանը լավացնել հարաբերությունները Թուրքիայի հետ, որոնց վատացման համար պատճառ են դարձել նաև Ադրբեջանի՝ փաստորեն «Նաբուկո» գազատարից հրաժարվելն ու Անկարայի պայմանը՝ գնած ադրբեջանական գազը Եվրոպային` իր կողմից վաճառելու մասին: Նման իրավիճակում Ադրբեջանի իշխանությանն այլ բան չի մնում, քան՝ հաշտվել Անկարայի հետ և համաձայնեցնել գործունեությունը՝ «ընդհանուր թշնամիներին» դիմադրելու համար:
Հետաքրքրական է, թե դրա դիմաց ինչ է պահանջելու Անկարան Բաքվից, հարցադրել է թերթը: Ադբեջանական թերթը հավելել է, որ «ինչպես երևում է, ներկա իրավիճակում Թուրքիայի և Ադրբեջանի պաշտոնական շրջանակները կարող են խոսել միայն Իրանի հետ կապված խնդրի շուրջ»: «Թուրքիայի կառավարությունն առայժմ դեմ է արտահայտվում Իրանի դեմ հնարավոր պատժամիջոցների ուժեղացմանը:
Իրանին հավելյալ պատժամիջոցներ հարուցելու հարցում Ռուսաստանի և ԱՄՆ-ի միջև ձեռք բերված համաձայնությունից հետո, Ադրբեջանը կանգնած է ընտրություն կատարելու հարկադրանքի առաջ: Ադրբեջանը խուսափում է Իրանին դեմ դիրքորոշում ընդունելուց: Ինչպես երևում է, Ադրբեջանը Թուրքիայից պետք է ներողություն հայցի, որ այդ հարցում չի կարող լինել Անկարայի կողքին», -եզրահանգել է թերթը:
