Երեկ Ադրբեջանի նախագահ Իլհամ Ալիևի հրամանով պաշտոնից ազատվել է այդ երկրի գլխավոր զինկոմ, գեներալ-լեյտենանտ Ալիաղա Հուսեյնովը: Վերջինս զորացրվել է իրական զինվորական ծառայությունից` վերածվելով պահեստային սպայի:
Իսկ բոլորովին վերջերս Նախիջևանի ռազմական զորամիավորման հրամանատար, գեներալ-լեյտենանտ Քյարամ Մուստաֆաևը նշանակվել է նորաստեղծ ցամաքային ուժերի հրամանատար: Ադրբեջանական «Ազադլիգ թերթը», հիմնվելով պաշտպանության նախարարության մամուլի ծառայության պետ Էլդար Սաբիրօղլուի այն արտահայտության վրա, իբր` պաշտպանության նախարարության համակարգում կադրային բարեփոխումները կատարվում են նախարարության գործունեությունն էլ ավելի բարելավելու նպատակով, պնդում է, որ Քյարամ Մուստաֆաևը շուտով կփոխարինի Սաֆար Աբիևին պաշտպանության նախարարի պաշտոնում:
Հիշեցնենք, որ սույն թվականի նոյեմբերի 2-4-ին Ադրբեջանում էր գտնվում ցամաքային զինված ուժերի գլխավոր հրամանատար Ըշիկ Կոշաների ղեկավարած Թուրքիայի ռազմական պատվիրակությունը: Թուրք բարձրաստիճան զինվորականների հետ հանդիպումից անմիջապես հետո Ադրբեջանում որոշում է կայացվում ստեղծել ցամաքային զորքերի միասնական շտաբ, որը և այսուհետև ղեկավարելու է Քյարամ Մուստաֆաևը:
Նշենք, որ Քյարամ Մուստաֆաևը բավական երկար ժամանակ ծառայում է Նախիջևանում: Նա հանդիսանում էր Հեյդար Ալիևի մտերիմներից մեկը և դեռևս նրա իշխանության տարիներից մեծ լիազորություններ ունենալով Նախիջևանում` տիրապետում էր իշխանական լծակների:
Ըստ որոշ տեղեկությունների, գեներալի հարաբերություններն Իլհամ Ալիևի հետ հեռու են մտերիմ կոչվելուց: Սակայն, ի շնորհիվ Թուրքիայի օժանդակության, Մուստաֆաևը շարունակում է, փաստորեն, իշխել Նախիջևանում:
| 
