Նյու Յորքի «Չիպրիանի» ընդունելությունների սրահում նախագահ Սերժ Սարգսյանի պատվին կազմակերպված ընդունելությանը մասնակցելու ցանկություն էր հայտնել նաև ԱՄՆ պետքարտուղար Հիլարի Քլինթոնը, սակայն Վաշինգտոնում անհետաձգելի գործերի պատճառով չէր կարողացել ժամանել Նյու Յորք՝ փոխարենն իր ողջույն ու բարեմաղթանքներն էր հղել ՀՀ նախագահին ու միջոցառման մասնակիցներին: Նա մասնավորապես նշել էր. «Քանի որ չկարողացա միանալ այս երեկոյին, ես ցանկանում եմ գոհունակությունս հայտնել Ձեզ ու ամերիկահայերի համայնքին, Ձեր դրական դերակատարման և հայ-ամերիկյան հարաբերություններում ակտիվ ներգրավվածության համար: Միացյալ Նահանգները արժևորում է Հայաստանի հետ ունեցած գործընկերությունը և մշակութային ու պատմական կապերը, որ միացնում են մեր ժողովուրդներին:
Երկու տասնամյակ առաջ Հայաստանը թևակոխեց դեմոկրատական ուղի: Հայաստանը կարևոր առաջընթաց է ունեցել, սակայն պատմությունը ցույց է տվել, որ այդ ճանապարհը հեշտ ու ուղիղ չի եղել: Ես Ձեզ հետ միասին տոնում եմ Ձեր նվաճումները և խրախուսում բոլոր ամերիկահայերին կրկնապատկել հայ-ամերիկյան հարաբերությունների հզորացման ջանքերը: Աշխարհի բոլոր մարդիկ երազում են ավելի բարգավաճ և դեմոկրատական ապագա իրենց և իրենց երեխաների համար: Ձեր այցելության կապակցությամբ ես իմ ջերմ բարեմաղթանքներն եմ հղում Հայաստանի ժողովրդին ու Ամերիկայի հայ համայնքին»:
Նշենք, որ միջոցառումը կազմակերպվել էր ԱՄՆ-ում ՀՀ դեսպանության, ՄԱԿ-ում ՀՀ մշտական ներկայացուցչության և ամերիկահայ կազմակերպությունների համատեղ ջանքերով: Ինչպես հայտնում է Panorama.am-ի թղթակիցը, Նյու Յորքի «Չիպրիանի» ընդունելությունների սրահում կայացած միջոցառմանը, բացի հանրապետության ղեկավարից ու նախագահի գլխավորած պատվիրակության անդամներից, որի կազմում էին նաև ՀՀ արտաքին գործերի և Սփյուռքի նախարարները, մասնակցել են նաև ԱՄՆ-ում գործող ՀՀ դիվանագիտական ներկայացուցչությունների աշխատակիցները, ԱՄՆ կոնգրեսական Ֆրենկ Փալոնեն, ԱՄՆ Արևելյան ափում ապրող և գործունեություն ծավալող հայազգի տասնյակ գործիչներ, համայնքի ներկայացուցիչներ:
/Panorama.am/
| 
