Երեկ Ստոկհոլմում ավարտվեց Ռուսաստան-Եվրամիություն գագաթնաժողովը, որի արդյունքում կողմերը հայտարարեցին, որ համաձայնության են եկել կլիմային և էներգետիկային վերաբերող հարցերում և չեն կարողացել միասնական դիրքորոշում մշակել Ռուսաստան-Վրաստան հակամարտության կարգավորման գործում:
Ինչպես հաղորդում է BBC-ի ռուսական ծառայությունը, Ռուսաստանի նախագահ Դմիտրի Մեդվեդևն ընդհանուր առմամբ գոհ է մնացել գագաթնաժողովի արդյունքներից: «Անդրկովկասում մեր դիրքորոշումները չեն համընկնում, դա պետք է բացեիբաց խոստովանել: Սակայն դա դեռ առիթ չէ, որպեսզի իրավիճակը դրամատիզացնենք: Ընդհակառակը, անհրաժեշտ է մոտեցնել դիրքորոշումները, անհրաժեշտ է ճանապարհներ որոնել ներկայումս Անդրկովկասում ստեղծված ծանր իրավիճակը կարգավորելու համար», – ասել է Ռուսաստանի նախագահը և հավելել, որ կան Արևմուտքի հետ համագործակցության նաև դրական օրինակներ: Այդպիսին Մեդվեդևը համարել է Լեռնային Ղարաբաղի հակամարտության կարգավորումը. «Այնտեղ կա դրական առաջընթաց: Դա օրինակ է, թե ինչպես մենք կարող ենք կամ կարող էինք համագործակցել, եթե անցած տարվա օգոստոսին չլիներ հայտնի ագրեսիան»:
Մեդվեդևի խոսքերի համաձայն, Ռուսաստանը հակասություններ չունի ԵՄ հետ նաև Իրանին, Աֆղանստանին, Պակիստանին վերաբերող հարցերում:
|
