Սեպտեմբերի 20-ին Բելառուսի ազգային մամուլի կենտրոնում տեղի է ունեցել ՀՀ դեսպան, ԱՊՀ կառույցներում ՀՀ մշտական ներկայացուցիչ Արմեն Խաչատրյանի մամուլի ասուլիսը` նվիրված ՀՀ անկախության 20-րդ տարեդարձին:
ՀՀ արտաքին գործերի նախարարութան մամուլի, տեղեկատվության և հասարակայնության հետ կապի վարչության փոխանցմամ` ՀՀ դեսպանը ներկայացրել է անցած 20 տարիների ընթացքում Հայաստանի զարգացման ուղին, բարձր է գնահատել հայ-բելառուսական հարաբերությունները, ինչպես նաև կարևորել ԱՊՀ դերը, որի ակտիվ մասնակիցն է Հայաստանը:
Խոսելով առևտրատնտեսական երկկողմ հարաբերությունների մասին` Հայաստանի դեսպանը ընդգծել է, որ վերջին տաս տարիների ընթացքում երկկողմ առևտրաշրջանառության ծավալը աճել է ավելի քան 20 անգամ: Դեսպան Խաչատրյանը նաև նշել է, որ մայիսի 18-ին կայացած ՀՀ վարչապետ Տիգրան Սարգսյանի պաշտոնական այցի ընթացքում քննարկվել են առևտրատնտեսական բնագավառներում և արդյունաբերական կոոպերացիայի խորացման նպատակով համագործակցության ընդլայնման հնարավորություններ, որոնց իրագործման համար կողմերը ներկայումս մանրակրկիտ և հետևողական աշխատանքներ են տանում: Քաղաքական երկխոսության տեսանկյունից դեսպան Խաչատրյանը կարևորել է վերջերս Հայաստանի արտգործնախարար Էդվարդ Նալբանդյանի Մինսկ կատարած այցելությունը և բովանդակալից բանակցությունները Բելառուսի նախագահի և արտգործնախարարի հետ:
Սեպտեմբերի 20-ին ԱՊՀ քարտուղարության շենքում ԱՊՀ կառույցներում ՀՀ մշտական ներկայացուցչությունը կազմակերպել էր ցուցահանդես, որին ներկա էին Մինսկում հավատարմագրված դեսպաններ և դիվանագետներ, ԱՊՀ գործադիր քարտուղարության աշխատակիցներ, ԶԼՄ-ի ներկայացուցիչներ: Միջոցառմանը ելույթ են ունեցել ԱՊՀ և այլ կանոնադրական կառույցներում ՀՀ մշտական ներկայացուցիչ Արմեն Խաչատրյանը, ինչպես նաև ԱՊՀ քարտուղարության պատասխանատու աշխատակիցներ, ովքեր բարձր են գնահատել Հայաստանի Հանրապետության դերը ԱՊՀ կառույցներում:
Սեպտեմբերի 21-ին ՀՀ դեսպանությունը կազմակերպել էր ընդունելություն ՀՀ անկախության 20-րդ տարեդարձի կապակցությամբ: Միջոցառմանը մասնակցել են Բելառուսի Հանրապետության իշխանության բոլոր ճյուղերի, երկրում հավատարմագրված դիվանագիտական առաքելությունների և միջազգային կազմակերպությունների, հայ համայնքի և Բելառուսի մտավորականության ներկայացուցիչներ:
Իր ելույթում ՀՀ դեսպանը հյուրերին ներկայացրել է Հայաստանի Հանրապետության 20-ամյա ուղին: Ողջույնի խոսքով հանդես է եկել Բելառուսի Հանրապետության արտաքին գործերի նախարարի առաջին տեղակալ Իգոր Պետրիշենկոն: Ընդունելության ընթացքում տեղի է ունեցել հայ համայնքի ներկայացուցիչների կողմից կազմակերպված տոնական համերգ:
/Panorama.am/
| 
