«Այն, որ անկախության 20-ամյակին Հայաստանում զինվորական շքերթ է տեղի ունենում, դա իր մեջ մեծ խորհուրդ է պարունակում: Չէ, որ անկախության ամենամեծ ձեռքբերումներից մեկն էլ հայկական բանակն է, իսկ ներկայիս զինվորները՝ անկախության սերնդի ներկայացուցիչներն են»,- անդրադառնալով սեպտեմբերի 21-ին կայացած զինվորական շքերթին՝ Panorama.am-ին ասաց ԱԺ պատգամավոր, Աֆղանստանի պատերազմի վետերանների միության նախագահ Արմեն Մխիթարյանը:
Անդրադառնալով Ադրբեջանի կողմից՝ Հայաստանում կայացած շքերթը սվիններով ընդունելու փաստին՝ պատգամավորը նշեց, որ դա սպասելի էր, քանի որ ոչ միայն շքերթը, այլ նաև Հայաստանում տեղի ունեցող ցանկացած դրական երևույթ Բաքվում նման արձագանքի է արժանանում:
«Որքան մենք արհամարհում ենք Բաքվի մեղադրանքները, պահվածքը, նրա բարձրացրած անհիմն աղմուկը, այնքան նրանք ավելի շատ են դուրս գալիս «ափերից»: Ադրբեջանում պետք է լավ իմանան. ի տարբերություն իրենց, մենք մեր ուժն ու հզորությունը առիթ ունեցել ենք նրանց ցուցադրելու գործնական դաշտում»,- եզրափակեց Ա. Մխիթարյանը:
/Panorama.am/
|
