«Մենք շատ ենք շեշտում, որ Աբդուլլահ Գյուլը հայտարարել է, թե տեսնում է Լեռնային Ղարաբաղի հակամարտության լուծումը Ադրբեջանի տարածքային ամբողջականության շրջանակներում, բայց երբ տողերի արանքով կարդում ենք, տեսնում ենք, որ «Ադրբեջանի տարածքային ամբողջականություն» ասելով` Թուրքիան հասկանում է ազատագրված 7 շրջանները, այլ ոչ թե Լեռնային Ղարաբաղի տարածքը»,- լրագրողների հետ հանդիպման ժամանակ նշեց թուրքագետ Արտակ Շաքարյանը` անդրադառնալով Բաքվում Ադրբեջանի և Թուրքիայի նախագահների կողմից` ռազմական համագործակցության վերաբերյալ ստորագրված պայմանագրին:
Թուրքագետը նշեց, որ չնայած հայտնի չեն պայմանագրի կետերը, սակայն ասուլիսից պարզ է դառնում, որ այն որևէ նորություն չի պարունակում: Բացի այդ, նա հայտնեց, որ ասուլիսում հնչած հարցը, թե ինչ է լինելու Լեռնային Ղարաբաղի հետ, և Ա. Գյուլի պատասխանը, թե այն դեռ քննարկման է ենթակա, վկայում է, որ Ադրբեջանում էլ է ընկալելի Թուրքիայի տեսակետը Ադրբեջանի տարածքային ամբողջականության վերաբերյալ:
Այս համատեքստում քննելով նաև ռուս-հայկական պայմանագրի թարմացումը, այն է Հայաստանում ռուսական ռազմակայանի գործունեության երկարաձգելը, Ա. Շաքարյանը վերլուծեց տարածաշրջանային զարգացումները:
«Ստեղծվում է մի իրավիճակ, երբ Եվրամիությունը զբաղված է տնտեսական ճգնաժամի խնդիրներով, Մինսկի խումբն այնքան էլ ակտիվ չէ, քանի որ կողմերը չեն հանգում մի որևէ վերջնակետի, ԱՄՆ-ն էլ դուրս է գալիս տարածաշրջանից` զորքերը հանում է Իրաքից, ուստի գործն ընկնում է Ռուսաստանի և Թուրքիայի վրա, որոնք փորձում են վերադասավորել իրենց ուժերն ու ավելի ամրապնդել դիրքերը տարածաշրջանում»,- ընդգծեց Ա. Շաքարյանը, ով այս ամենի մեջ չանտեսեց նաև Իրանի դերն ու Իրանի շուրջ ստեղծված իրավիճակը:
Ամփոփելով իր խոսքը` թուրքագետը հայտնեց, որ եթե դիտարկենք, թե հանկարծ Իրան-Իսրայել-ԱՄՆ որևէ խառն իրավիճակ կարող է առաջանալ, ապա այն հավելյալ առիթ կստեղծի Ղարաբաղյան հակամարտության վերաթարմացման համար, ինչի ուղղությամբ էլ հենց ռուս-հայկական և թուրք-ադրեջանական պայմանագրերն են, որոնք վերաթարմացվեցին: /Aysor.am/
|
