Հոկտեմբերի 21-ին Ստեփանակերտի քաղաքային հուշահամալիրում տեղի է ունեցել Ֆրանսիայի Ազգային ժողովի նախկին պատգամավոր, Եվրախորհրդարանի պատվավոր պատգամավոր, հայ ժողովրդի անկեղծ բարեկամ Անրի Սաբիի աճյունի հուղարկավորման արարողությունը։ Այն իրականացվել է ի կատարումն հանգուցյալի կտակի, ըստ որի նա խնդրել է իր աճյունը հողին հանձնել Հայաստանում և Լեռնային Ղարաբաղում։Այս մասին տեղեկացնում է ԼՂՀ ԱԺ մամուլի ծառայությունը:
Սգո միջոցառմանը մասնակցել են ԼՂՀ Ազգային ժողովի նախագահ Աշոտ Ղուլյանը, Հայ Առաքելական Եկեղեցու Արցախի թեմի առաջնորդ Պարգև Արքեպիսկոպոս Մարտիրոսյանը, խորհրդարանի պատգամավորներ, կառավարության անդամներ, Ստեփանակերտի քաղաքապետը, կուսակցական և հասարակական գործիչներ, հոգևոր դասի, մտավորականության ներկայացուցիչներ, Արցախում աշխատող կամ հյուրընկալվող սփյուռքահայ, այդ թվում նաև ֆրանսահայ հայրենակիցներ։
Արարողությանը Անրի Սաբիի վերջին կամքի և նրա անցած կյանքի ուղու մասին խոսել է Ֆրանսիայում ԼՂՀ նախկին ներկայացուցիչ, հանգուցյալի վաղեմի գործընկեր ու բարեկամ Վարուժան Գրիգորյանը, ով երջանկահիշատակ խորհրդարանականի կամեցողությամբ ստանձնել էր նրա աճյունասափորների տեղափոխությունը Հայաստան և Արցախ։ Իր խոսքում նա հանգամանալի ներկայացրել է Անրի Սաբիի համընդգրկուն մարդասիրական գործունեությունը՝ այդ համատեքստում ընդգծելով նրա եռանդուն ջանքերն ի շահ Հայոց ցեղասպանության միջազգային ճանաչման, ի պաշտպանություն արցախահայության ազգային-ազատագրական պայքարի։ Նա ասել է, որ Անրի Սաբիի հայանպաստ գործունեությունը արժանվույնս է գնահատվել Հայաստանի իշխանությունների կողմից. դեռևս 1990թ. նա արժանացել է Երևանի Պատվավոր քաղաքացու կոչման, իսկ այս տարվա ապրիլին Նախագահ Սերժ Սարգսյանի հրամանագրով պարգևատրվել է «Մխիթար Գոշ» մեդալով, որը նրան հանձնվել է Փարիզում՝ Ֆրանսիայում ՀՀ լիազոր և արտակարգ դեսպանի միջոցով։
Հանգուցյալի մասին հիշատակի խոսք է ասել նաև ԱԺ նախագահ Աշոտ Ղուլյանը, խորհրդանշական համարելով, որ Անրի Սաբիի աճյունասափորը հողին է հանձնվում Ստեփանակերտի հուշահամալիրի այն հատվածում, որի հարևանությամբ ոչ հեռու ապագայում վեր է հառնելու Հայոց ցեղասպանության զոհերի հիշատակին կառուցվելիք հուշակոթողը։
Արարողությանը Արցախի հոգևոր հովվապետ Պարգև սրբազանը և թեմի հոգևորականները մատուցեցին հոգեհանգստյան հանդիսակարգ։ Ապա Անրի Սաբիի աճյունասափորը պահ տրվեց Արցախյան հողին։
/Panorama.am/
|
