Քաղաքական զարգացումների հետազոտական կենտրոնի նախագահ Վահան Դիլանյանը բաց նամակ է ուղղել Ամենայն Հայոց Կաթողիկոս Ն. Ս. Օ. Տ. Տ. Գարեգին Երկրորդին: Նամակում ասված է.
«Վեհափա´ռ տեր, Խոր հարգանք տածելով Հայ Առաքելական Սուրբ Եկեղեցու և Ձեր հովվապետական առաքելության հանդեպ, ընդունելով քրիստոնեության արժեքային համակարգը` խաղաղություն ու հանդուրժողականություն սերմանելու և ներողամիտ լինելու բարձրագույն արժեքներով, ճանաչելով միջազգային հումանիտար իրավունքի պահանջները, ինչպես նաև ողջունելով Մայր Աթոռի պարզաբանումը Ադրբեջանի ԶՈւ դիվերսիոն խմբի անդամ Մ. Իբրահիմովի դին վերադարձնելու կապակցությամբ, այդուամենայնիվ, դիմում ենք Ձեզ` խնդրանքով` չշարունակել ադրբեջանցի հանցագործի դին Ադրբեջանին վերադարձնելու հարցում Ձեր միջնորդությունը:
Վեհափա´ռ տեր, Ադրբեջանը պետական մակարդակով խրախուսում է նման անմարդկային հանցագործությունները. դիցուք` Մ. Իբրահիմովին Ադրբեջանի նախագահ Իլհամ Ալիևի կողմից հետմահու ազգային հերոսի կոչում շնորհելու փաստը, Ադրբեջանը դին վերադարձնելու խնդրանքով պետք է դիմի պաշտոնական Ստեփանակերտին, այնինչ նման խնդրանք չի եղել ո’չ Ստեփանակերտին, ո’չ Երևանին:
Ելնելով վերը նշվածից, և հավաստելով մեր խոր ակնածանքը Ձեր հայրապետության հանդեպ, կրկին խնդրում ենք Ձեզ` չշարունակել միջնորդությունը տվյալ հարցում»:
Հիշեցնենք, որ սեպտեմբերի սկզբին Մոսկվայի և Համայն Ռուսիո Պատրիարք Կիրիլ Առաջինը Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին էր ներկայացրել Կովկասի մահմեդականների հոգևոր վարչության նախագահ Շեյխ ուլ իսլամ Փաշա Զադեի խնդրանքը՝ միջնորդելու ՀՀ իշխանություններին` Ադրբեջանին վերադարձնելու հուլիսի 19-ին ԼՂՀ Մարտակերտի շրջանի Չայլու գյուղի դիրքերի վրա հարձակված դիվերսիոն խմբի անդամ Մ. Իբրահիմովի դին: Խնդրի առնչությամբ Նորին Սրբությունը հանդիպում է ունեցել Հայաստանի Հանրապետության նախագահ Սերժ Սարգսյանի հետ՝ ներկայացնելով Մոսկվայի և Համայն Ռուսիո Պատրիարքի և Ադրբեջանի հոգևոր առաջնորդի խնդրանքը:
/Aysor.am/
| 
