Այսօր ասուլիսի ժամանակ սահմանադրագետ, իրավաբան Հրայր Թովմասյանն անդրադարձավ հայկական մամուլին: Ըստ բանախոսի, մամուլը, քաղաքական ընդդիմության նման, պետք է ազդակ լինի իշխանությունների համար, ուղորդի հասարակության համար կարևոր հարցերի լուծմանը:
«Ես ընդդիմությանն ու լրագրողներին երբեմն համեմատում եմ իրար հետ և նույն հարթության մեջ եմ դնում՝ որպես պետության մեջ գլխավոր ֆունկցիա իրականացնող հասարակական օրգանիզմ», – ասաց նա, նշելով, որ հայաստանյան մամուլը դեռ չի կարողանում ստանձնել այդ դերը: Ըստ Հ.Թովմասյանի` Հայաստանի վերջին տարիների իրականությունը մամուլի միջոցով սև ու սպիտակ է ներկայացվում, արտահայտվում են ծայրահեղ կարծիքներ, սակայն ոչ մի լուծում չի նշմարվում։
«Երբ ես թերթում եմ օրվա մամուլը, ես պետք է բժշկի գնամ, որպեսզի պարզեմ, թե իմ տեսողությունն ու լսողությունն արդյո՞ք ճիշտ են, արդյո՞ք ես խանգարում ունեմ, թե չունեմ, որովհետև մի դեպքում ես ապրում եմ շատ պայծառ, շատ լավ ապագա ունեցող մի երկրում, մյուս դեպքում՝ հեսա վաղը կամ մյուս օրը, ըստ էության, երկիրը կործանվելու է։ Եվ, ըստ էության, չգիտեմ, թե ես սրանցից որ երկրում եմ ապրում», – պարզաբանեց իրավաբանը, որպես օրինակ բերելով Ադրբեջանի կողմից ՄԱԿ-ի Գլխավոր ասամբլեայում ներկայացված բանաձևի վերաբերյալ քննարկումների լուսաբանումը:
«ՄԱԿ–ում պետք է քննարկվի բանաձևը. մի մասն ասում է, որ դա թղթի կտոր է, մյուս մասը՝ սա Հայաստանի վերջն է։ Հիմա ես մասնագետ չեմ, շարքային քաղաքացի եմ, ես ուզում եմ քաղաքական ընդդիմության և իշխանության պայքարում հասկանամ՝ սա իրոք՞ թղթի կտոր է, թե սա մեր երկրի վերջն է»,- ասաց Հ.Թովմասյանը: /Aysor.am/
|
