Համաշխարհային ֆինանսատնտեսական ճգնաժամը Հայաստանի պլաններում լուրջ շտկումներ է մտցրել, գտնում է ՀՀ նախագահ Սերժ Սարգսյանը:
«Մինչ այդ` Հայաստանի տնտեսության զարգացումը գրեթե տասը տարիների ընթացքում չափվում էր երկնիշ թվերով: Մեր պետական պարտքը մեծ չէր, իսկ մակրոտնտեսական ցուցանիշները շատ լավն էին: Բայց մեկուսացված դրությունը, շահավետ տրանսպորտային ենթակառուցվածքների բացակայությունը միշտ խնդիր են եղել և, ցավոք, մեր տնտեսությունը բավարար չափով դիվերսիֆիկացված չէր: Հայաստանի տնտեսական ցուցանիշներն աճել են, այդ թվում` և' շինարարության հաշվին, և' այն միջոցների, որոնք մենք ստացել ենք արտերկրում ապրող մեր հայրենակիցներից»,- ասել է ՀՀ նախագահը` «Պրոֆիլ» ամսագրի հետ հարցազրույցում:
Երկրի ղեկավարը նշել է, որ տնտեսական անկումը պայմանավորված էր նաև բնակչության խուճապով: « Ե'վ համաշխարհային ճգնաժամի հետևանքով, և' շատ մարդկանց խուճապի մատնվելու պատճառով մեր տնտեսությունը շատ ծանր հարված ստացավ` կորցրինք ՀՆԱ-ի 14 տոկոսը: Բայց նույնիսկ այդ իրավիճակում մենք չենք կասեցրել ոչ մի սոցիալական ծրագիր, ոչ մի օր չենք ուշացրել կենսաթոշակները, սոցիալական վճարները, աշխատավարձերը: Միգուցե սա, նաև այն, որ Հայաստանում վաղուց շուկայական տնտեսություն է գործում, առավել կամ պակաս բարենպաստ ներդրումային մթնոլորտ կա, բանկային համակարգը կայուն է, ինչպես նաև հայերի ձեռներեցությունն օգնում են վերականգնել անցյալ տարի կորցրածը»,- ասել է երկրի ղեկավարը:
«Ցավոք, հիմա էլ ամեն ինչ հարթ չի ընթանում: Բնությունը մեզ երես չի տալիս, և արդյունաբերության 12 տոկոս աճի պայմաններում մենք գրեթե 25 տոկոս անկում ունենք գյուղատնտեսությունում: Այս տարի կորցրինք ծիրանի և այլ մրգերի ամբողջ բերքը, հացահատիկի հետ կապված` նույնպես ամեն ինչ կարգին չէ: Բայց, այնուամենայնիվ, կես տարվա արդյունքներով` գրեթե 7 տոկոս աճ ունենք: Կարծում եմ, որ տարին դրական ցուցանիշներով կավարտենք, չնայած` դժվար թե կարողանանք 100 տոկոսով վերականգնել 2009թ. կորցրածը»,- նշել է նախագահ Սարգսյանը:
Երկրի ղեկավարն անդրադարձել է նաև արտաքին պարտքերին և հակաճգնաժամային վարկերին: «Մենք այդ վարկերից ոչ մի լումա չենք ծախսել աշխատավարձեր կամ սոցիալական օգնություններ վճարելու համար: Ամբողջը ներդրվել է տնտեսությունում և կայունացման հիմնադրամում: Այսօր մեր պետական պարտքը ՀՆԱ-ի կեսից էլ քիչ է: Եթե դատենք ըստ վերցրած վարկերի` այն մոտավորապես 40 տոկոս է, իսկ եթե դատենք ըստ ստորագրված պայմանագրերի` 47-48 տոկոս: Դրանք միանգամայն նորմալ թվեր են: Ես կարող եմ թվել մոտ մեկ տասնյակ զարգացած երկրներ, որոնց պետական պարտքը գերազանցում է ՀՆԱ-ի 100 տոկոսը»,- ասել է ՀՀ նախագահը:
/Aysor.am/
|
