ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Մինսկի խմբի համանախագահների այցը տարածաշրջան նախապես պլանավորված էր, սակայն վերջին իրադարձություններն արհեստականորեն ավելի արագացրին այն: Ինչպես «Արմենպրես»-ին հայտնեց քաղաքագետ, voskanapat.info կենտրոնի ղեկավար Լեւոն Մելիք-Շահնազարյանը, վերջին իրադարձություններ ասելով, նկատի ունի ղարաբաղաադրբեջանական սահմանում առկա լարվածությունը եւ ՄԱԿ-ում Անդրբեջանի կողմից առաջ քաշված նոր բանաձեւի քննարկումն ու քվեարկումը:
«Կարծում եմ` Մինսկի խմբի համանախագահների այցելությունը տարածաշրջան երկու պատճառ ունի` ՄԱԿ-ում առաջ քաշված բանաձեւը եւ վերջին շրջանում ղարաբաղաադրբեջանական սահմանում տեղի ունեցած իրադարձությունները, որոնք մտահոգում են համանախագահող երկրներին, եւ վերջիններս փորձում են ամեն կերպ մեղմել առկա լարվածությունը»,-ասաց Լ. Մելիք-Շահնազարյանը` հավելելով, որ այս այցելությունից որեւէ լուրջ փոփոխություն ակնկալել պետք չէ, սակայն որոշ ժամանակով հնարավոր է տարածաշրջանային լարվածության թուլացում: Հիշեցնենք, որ սեպտեմբերի 4-ին` ժամը 06:50-ի սահմանում, ղարաբաղաադրբեջանական զորքերի շփման գոտու հյուսիս-արեւելյան ուղղությամբ (Ջրաբերդ բնակավայրից մոտ 2կմ հարավ) արձանագրվել է հակառակորդի հետախուզական-դիվերսիոն խմբի հերթական առաջխաղացման փորձ:
Ըստ Լ. Մելիք-Շահնազարյանի` Մինսկի խմբի համանախագահների այցից հետո Ադրբեջանը որոշ ժամանակով ավելի զուսպ կլինի իր հայտարարություններում եւ ավելի խելամիտ քայլեր կձեռնարկի: «Օգոստոսի 31-ի եւ սեպտեմբերի 4-ի դեպքերից հետո Ադրբեջանի ԶՈւ-ն ունի 10 զոհ, իսկ վիրավորների թիվը մեզ հայտնի չէ, ինչպես նաեւ վերջին շրջանում իրենց բանակում ինքնասպանության եւ դժբախտ պատահարների հետեւանքով 4-5 այլ զոհեր էլ են գրանցվել: Սա Ադրբեջանի համար բարոյական ծանր հարված է»,-նշեց քաղաքագետը: Անդրադառնալով Ադրբեջանի կողմից ՄԱԿ-ում ներկայացված բանաձեւին` Լ. Մելիք-Շահնազարյանը նշեց, որ Մինսկի խմբի համանախագահները չեն կարողանա Ադրբեջանին ստիպել հրաժարվել այդ բանաձեւը քննարկման դնելուց, սակայն նրանք կարող են դեմ քվեարկել դրան:
«Ամեն ինչ կախված է համանախագահների քվեարկելուց: Եթե դեմ քվեարկեն, ինչպես նախորդ անգամ, ապա մենք կշահենք: Դա կնշանակի, որ Ադրբեջանը հակասությունների մեջ է մտել Մինսկի խմբի համանախագահող պետությունների հետ եւ այդ բանաձեւն իրական ազդեցություն չի կարող ունենալ»,-ասաց քաղաքագետը` հիշեցնելով, որ ՄԱԿ-ն ինքն է դեռ 1993 թ.-ին հարցը տեղափոխել ԵԱՀԿ:
/Armenpress/
|