Էդվարդ Նալբանդյանի նյույորքյան այցելության երկրորդ օրը հագեցած էր երկկողմ հանդիպումներով:
Ինչպես հայտնում են ԱԳՆ մամուլի և տեղեկատվության վարչությունից, ՄԱԿ-ում Հայաստանի ներկայացուցչությունում Էդվարդ Նալբանդյանը ընդունեց Կոսովոյի արտաքին գերատեսչության ղեկավար Սքենդեր Հուսեյնիին` վերջինիս խնդրանքով:
Էդվարդ Նալբանդյանը նշեց, որ թեև Հայաստանը չի ճանաչել Կոսովոն, սակայն նման կարգի հանդիպումները օգտակար են մտքերի փոխանակման համար:
Նախարար Նալբանդյանի խոսքերով ս.թ. հուլիսին Կոսովոյի վերաբերյալ Արդարադատության միջազգային դատարանի խորհրդատվական կարծիքի հրապարակումով վերահաստատվեց այն իրողությունը, որ միջազգային իրավունքի ամենահիմնարար սկզբունքներից մեկը` ժողովուրդների ինքնորոշման իրավունքը, չի կարող ստորադասվել որևէ այլ սկզբունքի:
Հայաստանի ներկայացուցչությունում կայացավ նաև Հայաստանի և Էստոնիայի արտգործնախարարներ Էդվարդ Նալբանդյանի և Ուրմաս Պաետի հանդիպումը, որի ընթացքում քննարկվեցին տարբեր ոլորտներում հայ-էստոնական համագործակցությանն առնչվող բազմաթիվ հարցեր, մտքեր փոխանակվեցին Հայաստան – Եվրոպական Միություն հարաբերությունների և տարածաշրջանային հարցերի վերաբերյալ:
Հայաստանի և Էստոնիայի արտգործնախարարները ստորագրեցին դիվանագիտական անձնագիր ունեցող անձանց համար մուտքի արտոնագրերի պահանջը հանելու մասին համաձայնագիրը, որը Ուրմաս Պաետի բնորոշմամբ Հայաստան - ԵՄ մուտքի արտոնագրային ռեժիմի ընդհանուր դյուրացման գործընթացի կարևոր հանգրվաններից է:
Հունգարիայի արտգործնախարարի Յանոշ Մարտոնիի հետ հանդիպման ժամանակ Էդվարդ Նալբանդյանը շնորհավորեց նրան Հունգարիայի արտաքին քաղաքական գերատեսչության ղեկավարի պաշտոնում նշանակվելու կապակցությամբ և փոխանցեց Հայաստանի Նախագահ Սերժ Սարգսյանի ուղերձը` ուղղված Հունգարիայի Նախագահ Լասլո Սոլյոմին:
Նախարարները քննարկեցին երկկողմ հարաբերությունների զարգացմանը և ամրապնդմանը վերաբերող հարցեր: Նրանք հանգամանալից զրույց ունեցան Հայաստան-Եվրոպական Միություն հարաբերությունների, Արևելյան գործընկերության ձևաչափով համագործակցության խնդիրների շուրջ: Հունգարիայի ԱԳ նախարարն իր հայաստանյան գործընկերոջը տեղեկացրեց հաջորդ տարվա մայիսին կայանալիք Արևելյան գործընկերության անդամ երկրների գագաթաժողովի նախապատրաստական աշխատանքների մասին:
Էդվարդ Նալբանդյանը Յանոշ Մարտոնին հրավիրեց այցելել Հայաստան:
Էդվարդ Նալբանդյանի և Սինգապուրի արտգործնախարար Ջորջ Յուի հետ հանդիպման ժամանակ քննարկվեցին երկկողմ հարաբերությունների, իրավապայմանագրային դաշտի ձևավորման, տնտեսական համագործակցության խթանման, միջազգային կազմակերպությունների շրջանակներում փոխգործակցությանն առնչվող հարցեր:
Սկսված երկխոսությունը շարունակելու նպատակով Ջորջ Յուnն Էդվարդ Նալբանդյանին հրավիրեց այցելել Սինգապուր:
Էդվարդ Նալբանդյանի հանդիպմանը 2011 թ. ԵԱՀԿ նախագահությունը ստանձնող Լիտվայի արտգործնախարար Աուդրոնիուս Աժուբալիսի հետ անդրադարձ կատարվեց մի շարք երկկողմ, տարածաշրջանային և միջազգային հարցերի: Նախարարները մտքեր փոխանակեցին Հարավային Կովկասում անվտանգության ապահովմանն առնչվող խնդիրների և դրանց լուծման ուղիների վերաբերյալ: Հայաստանի և Լիտվայի արտգործնախարարները հանգամանալից զրույց ունեցան ղարաբաղյան հիմնախնդրի կարգավորման գործընթացի վերաբերյալ:
Էդվարդ Նալբանդյանի հաջորդ հանդիպումը Մակեդոնիայի նախկին հարավսլավական Հանրապետության արտգործնախարար, Եվրոպայի Խորհրդի նախարարների կոմիտեի նախագահ Անտոնիո Միլոշսկիի հետ էր:
Նախարարներն անդրադարձան ս.թ. հոկտեմբերին Հայաստանում անցկացվելիք Եվրոպայի Խորհրդի «Հանուն ժողովրդավարության ֆորումի» նախապատրաստական աշխատանքներին և այդ միջոցառմանը ԵԽ նախարարների կոմիտեի նախագահի մասնակցությանը:
Նույն օրն Էդվարդ Նալբանդյանը հանդիպեց նաև Կիպրոսի Հանրապետության ԱԳ նախարար Մարկոս Կիպրիանուի հետ: Զրուցակիցները քննարկեցին հաջորդ տարվա սկզբին Հայաստանի Նախագահի Կիպրոս այցի նախապատրաստական աշխատանքները, կիպրական հիմնահարցի հանգուցալուծման ուղղված գործընթացի վերջին զարգացումները, միջազգային կազմակերպություններում երկու բարեկամ երկրների համագործակցությանն առնչվող հարցեր:
/Aysor.am/
| 
