Արցախի նախագահ Բակո Սահակյանը օգոստոսի 17-ին Ստեփանակերտի մշակույթի եւ երիտասարդության պալատում մասնակցել է Շինարարի օրվա կապակցությամբ կազմակերպված տոնական միջոցառմանը, տեղեկացնում են նախագահի լրատվական ծառայությունից: Բակո Սահակյանը պետական պարգեւներ է հանձնել ոլորտի մի խումբ ներկայացուցիչների եւ հանդես եկել շնորհավորական խոսքով:
Իր խոսքում երկրի ղեկավարը նշել է, որ մեր ժողովուրդը դարեր ի վեր աչքի է ընկել իր ստեղծարար աշխատանքով, միշտ կառուցել ու շենացրել է հայրենի օջախն ու երկիրը: Նախագահն ընդգծել է, որ այսօր էլ շինարարության ոլորտը հանդիսանում է հանրապետության կենսագործունեության գերակա ուղղություններից մեկը, եւ այն, որ Արցախն արդեն իսկ դարձել է բարետես ու բարեկարգ, նաեւ շինարարների տքնաջան աշխատանքի արդյունքն է:
Նախագահ Սահակյանը միեւնույն ժամանակ նշել է, որ անելիքները ոլորտում դեռ շատ են ու բազմաբնույթ: Պետք է ուշադրության կենտրոնում պահել շինարարական աշխատանքների արդյունավետության բարձրացման, որակի եւ ժամկետների պահպանման հետ կապված խնդիրները:
Միջոցառմանը մասնակցել են Ազգային ժողովի խոսնակ Աշոտ Ղուլյանը, վարչապետ Արա Հարությունյանը, պաշտոնատար այլ անձինք:
/Panorama.am/
| 
