"ԱՐՄԵՆՊՐԵՍ”-ի փոխանցմամբ` Սիրիայում 10 տարով շահութահարկից կազատվի այն պետությունը, որը որեւէ արտադրություն կհիմնի: Սիրիայի կառավարությունը խթանում է ներդրումային դաշտը թե համատեղ ձեռնարկություններ ստեղծելու, թե արտադրություն հիմնելու նպատակով: Այս մասին հայտնել է Հայ-սիրիական գործարար խորհրդի համանախագահ Արամ Վարդանյանը, ավելացնելով, որ դա շահավետ հնարավորություն է հայկական կողմի համար: Հայաստանի Հանրապետությունում մշակվել է բուսական մնացորդներից չոր վառելիք` բրիկետ, ստանալու արդյունավետ մեխանիզմ:
«Բիոզանգվածներից այսպիսի չոր վառելիք ստանալը լավ բացահայտում է, քանի որ վերջինս քարածխի չափ տաքացնում է` 20-25 անգամ ավելի քիչ արտանետելով ածխաթթու գազ, քան քարածուխը կամ բնական գազը, միեւնույն ժամանակ էկոլոգիապես մաքուր է»,-նշել է Ա. Վարդանյանը:
Նրա տեղեկացմամբ` հնարավոր է նաեւ ստեղծել փոքր ջերմաէլեկտրակայաններ` 100-1000 կիլովատտ հզորությամբ` ստանալու եւ էլեկտրականություն, եւ ջերմային էներգիա: Սիրիայում բավական մեծ ծավալի գյուղատնտեսական մշակաբույսերի թափոններ են առաջանում, մասնավորապես` ցորենի հավաքից հետո` ծղոտի տեսքով, ինչպես նաեւ բամբակի բերքահավաքից:Ըստ Ա. Վարդանյանի` Դեր Զորը ամենաարեւաշատ քաղաքներից է, որտեղ ամպամածություն գրեթե չի լինում, ինչը նշանակում է, որ վերականգնողական էներգետիկայի մեծ ներուժ ունի:
«Արեւային էներգետիկայի այդքան մեծ ռեսուրսները էլեկտրակայանների կառուցման հիման վրա հնարավորություն կտան զարգացնելու այլընտրանքային էներգիայի այդ եզակի աղբյուրը» ,-ասաց նա: Սիրիացի գործարարների պատվիրակության` Հայաստանի առեւտրաարդյունաբերական պալատ կատարած այցի ընթացքում, ի պատասխան հայկական կողմի այս նկատառմանը, Դեր Զորի նահանգապետ Հուսեյն Առնուսն ասել է, որ սիրիական կառավարության անունից անմիջապես պատրաստ է ողջունել այդ գաղափարը եւ ձեռնամուխ լինել վերջինիս իրագործմանն ուղղված հստակ քայլերի նախապատրաստմանը:
Ընդգծվել է նաեւ Սիրիայիում հայ-սիրիական գործարարների խորհրդի գործունեության արդյունավետությունը եւ հույս հայտնվել այդպիսի մի կառույց էլ առաջիկայում Հայաստանում ստեղծելու վերաբերյալ:
/Times.am/
|