Քաղաքացիական ինքնաթիռները ոչնչացնելու սպառնալիք հնչեցնում են միայն ահաբեկչական կազմակերպությունները` որևէ պետություն նման բան չի արել: Այսօր, շվեցարացի գործընկերոջ հետ համատեղ ասուլիսում արձագանքելով Panorama.am-ի հարցին, նշեց ՀՀ նախագահ Սերժ Սարգսյանը:
Նախագահներ Սարգսյանից ու Միշելին Կալմի-Ռեյից, մասնավորապես, խնդրել էինք մեկնաբանել Երևան-Ստեփանակերտ ավիաչվերթի սպասվելիք վերականգնման համատեքստում Ադրբեջանի տարբեր պետական գերատեսչություններից հնչած հայտարարությունները, որոնցում սպառնում են ոչնչացնել Ստեփանակերտ մեկնող բոլոր քաղաքացիական ինքնաթիռները:
«Այդպիսի հայտարարություններ աշխարհի մերօրյա պատմության մեջ եղել են և քիչ չեն եղել: Բայց այստեղ մի բայց կա: Այդ հայտարարությունները միշտ հնչել են ահաբեկչական կազմակերպությունների կողմից, և որևիցե պետության կողմից այդպիսի հայտարարություն չի հնչել: Պետության կողմից այդպիսի հայտարարություն հնչեցնելը, ինչպես ասեմ, մառազմ է, հիվանդ մարդկանց ելույթներ են, ժամանակավրեպ, անցած բաներ են: Ի՞նչ է նշանակում, երբ պետությունն ասում է, որ ես կոչնչացնեմ քաղաքացիական ինքնաթիռը: Այսինքն` այս հայտարարությունը մեկնաբանելու կարիք չկա»,- ի պատասխան նշեց ՀՀ նախագահ Սերժ Սարգսյանը:
Միաժամանակ նախագահը հայտնեց, որ վերականգնվելիք ավիաթռիչքի առաջին ուղևորն է լինելու: Դիմելով շվեցարացի գործընկերոջը` հանրապետության ղեկավարը հույս հայտնեց, որ այդ հարցում Շվեյցարիայի Համադաշնությունը ամբողջովին սատարում է այդ մոտեցումը:
/Panorama.am/
|
