Լիտվայում հայտնաբերվել է ԱՄՆ Կենտրոնական Հետախուզական Վարչության (ԿՎՀ) գաղտնի բանտ, որի գոյության մասին լրագրողներն իմացել են դեռևս 2009 թվականի ամռանը: Այդ մասին տեղեկություն է տարածել «ABC» հեռուստաընկերությունը: Բանտը գտնվում էր Վիլնյուսից քսան կիլոմետր հեռավորությամբ տեղադրված Անտիվիլայ գյուղի նախկին ձիահեծարանի տարածքում: Այդ տեղեկությունն արդեն հաստատել են Լիտվայի մի պաշտոնյա և ԿՀՎ նախկին աշխատակիցներից մեկը:
Հեռուստաընկերության տեղեկությունների համաձայն, մասնավոր ձիահեծարանը գնվել է 2004 թվականին ԱՄՆ-ում գրանցված Elite ՍՊԸ-ի կողմից: Մի քանի ամիսների ընթացքում շենքը վերանորոգվել է և ամբողջությամբ համապատասխանեցվել իր նոր նշանակությանը: «ABC» հեռուստաընկերության զրուցակիցները հայտնել են, որ հայտնաբերված գաղտնի բանտը ժամանակին եղել է ՆԱՏՕ-ին անդամակցելու Լիտվայի վճարած «գնի» մի մասը:
Նշենք, որ Լիտվայում գաղտնի բանտի առկայության մասին «ABC»-ն հաղորդել է դեռևս այս տարվա օգոստոսին: Սակայն այն ժամանակ Լիտվայի արտգործնախարարությունն արագորեն հերքել է այդ լուրի ճշմարտացիությունը: Նոյեմբեր ամսին Լիտվայի պատգամավորները դարձյալ անդրադարձել են այդ թեմային` հանձնարարելով ազգային անվտանգության հանձնաժողովին տեղեկություններ ճշտել բանտի մասին և մինչև դեկտեմբերի 22-ը զեկույցով հանդես գալ:
Ինչպես պարզվել է, Լիտվայում գտնվող գաղտնի բանտը փակվել է դեռևս 2005 թվականին, այն բանից հետո, երբ մամուլում լուրեր տարածվեցին ԿՀՎ արտասահմանյան գաղտնի բանտերի մասին: Բանտի գոյության վերջին օրերին այնտեղ կար ութ բանտարկյալ:
Հիշեցնենք, որ սույն թվականի ապրիլին ԿՀՎ-ն հայտարարել է, որ արտասահմանում գտնվող բոլոր գաղտնի բանտերն այլևս փակված են: ԿՀՎ-ի ղեկավարությունն այդ որոշումը կայացրել է համաձայն Բարաք Օբամայի համապատասխան կարգադրության:
