Սերժ Սարգսյանը մնում է այն քաղաքական գործիչը, ում օգտին առավելագույնը կքվեարկեին, եթե մեկ շաբաթ անց նախագահական ընտրություններ լինեին: Նա գրեթե երեք անգամ` 28 տոկոս, ավելի կողմնակիցներ ունի, քան հնարավոր թեկնածու Գագիկ Ծառուկյանը` 10 տոկոս: Նման տվյալ է արձանագրել «Հայաստանի եվրոպացի բարեկամներ» կազմակերպությունը` հրապարակելով հոկտեմբերի 15-ից 18-ը դեմ առ դեմ կատարված 1208 հարցազրույցների միջոցով հանրային կարծիքի հարցման հայաստանյան արդյունքները:
Ինչպես ասաց «Պոպուլուս» հանրային կարծիքի ուսումնասիրություններով զբաղվող ընկերության գործադիր տնօրեն Էնդյու Կուպերը, բոլոր տարիքային խմբերին պատկանող հարցվողների մեծամասնությունն ասել է, որ իր ձայնը կտա հենց Սերժ Սարգսյանին:
«Չնայած Սերժ Սարգսյանն ամենաշատ կողմնակիցներ ունեցող քաղաքական գործիչն է, սակայն շատերը նշել են նաև, որ չգիտեն` ում կտան իրենց ձայնը, կամ էլ ոչ ոքի օգտին էլ չեն քվեարկի: Սարգսյանն, այնուամենայնիվ, ավելի շատ կողմնակիցներ ունի, քան իր կուսակցությունը»,- ասաց Կուպերը:
Խոսելով կուսակցությունների մասին` նա նշեց, սակայն, որ խորհրդարանական ընտրություններում «Բարգավաճ Հայաստան» կուսակցության օգտին կքվեարկի 26 տոկոսը, իսկ Հանարպետական կուսակցության օգտին` 21: Նա նկատեց, որ ՀՀԿ-ի դեպքում կողմնակիցների թիվը հավասարապես է բաշխված տարբեր տարիքային խմբերի միջև, մինչդեռ «Բարգավաճ Հայաստանի» կողմնակիցներն ավելի շատ երիտասարդներ են: Բանախոսը նշեց նաև, որ հայաստանցիների 7 տոկոսն իրենց ձայնը կտա Հայ հեղափոխական դաշնակցությանը, 4 տոկոսը` «Օրինաց երկրին», իսկ 3 տոկոսը` ՀԱԿ-ին:
Հարցվողների քառորդից ավելին` 27 տոկոսը, ըստ «Պոպուլուս»-ի գործադիր տնօրենի խոսքերի, երբեք չի քվեարկի Լևոն Տեր-Պետրոսյանի օգտին, 13 տոկոսը` Արթուր Բաղդասարյանի:
/Aysor.am/
|
