Այսօր Երևանի պետական համալսարանում բացվեց «Կրթությունը, գիտությունը և տնտեսությունը բուհերում. ինտեգրում միջազգային կրթական տարածքում» թեմայով միջազգային գիտական կոնֆերանսը, որը տևելու է մինչև սեպտեմբերի 30-ը: Կոնֆերանսին մասնակցում են 120 պատվիրակներ Հայաստանից, Լեհաստանից, Սլովակիայից, Կանադայից, Ռուսաստանից, Ղազախստանից:
Կոնֆերանսին ներկա էր ՀՀ վարչապետ Տիգրան Սարգսյանը: Ողջունելով համաժողովի մասնակիցներին` վարչապետը խորհրդանշական համարեց այն, որ համաժողովն անցկացվում է ՀՀ անկախության 20-ամյակի տոնակատարությունների օրերին: Վարչապետի խոսքերով` ՀՀ կառավարությունը երկրի տնտեսության ապագան տեսնում է մարդկային պոտենցիալի զարգացմամբ և մրցունակ հասարակությամբ: «Անցած 20 տարիների ընթացքում պետությունը կրթության ոլորտն հայտարարել է առջնահերթ, իսկ վերջին տարիներին, անցկացվող բարեփոխումների միջոցով մեծ ուշադրություն է հատկացվում կրթական համակարգին»,- ասաց Տ.Սարգսյանը:
Ըստ վարչապետի` միջազգային կրթական տարածք ինտեգրվելը անհրաժեշտ է կրթական հետագա մրցունակության համար, բացի դրանից այն հնարավորություն է տալիս ստեղծել որակյալ կադրեր: «Կրթական ինտեգրացիան ենթադրում է արդյունավետ զարգացման բարենպաստ պայմաններ` փորձի փոխանակման համար: Մենք պետք է գիտակցենք, որ մենք բոլորս հանդիսանում ենք մեկ սոցիալ-մշակութային տարածության մաս»,- նշեց Տ.Սարգսյանը: Նա միաժամանակ նշեց, որ այս կոնֆերանսը հնարավորություն կտա նորովի տեսնել ոլորտում առկա պրոբլեմները, ինչպես նաև այդ խնդիրների լուծման համար նոր ուղիներ գտնել:
/Panorama.am/
|