«Եվրոմիությանն անհրաժեշտ է խաղաղություն և կայունություն Հարավային Կովկասում»: Նման տեսակետ այսօր մամլո ասուլիսի ժամանակ հայտնել է քաղաքագետ Նարեկ Գալստյանը:
«ԵՄ-ը Հարավային Կովկասում ունի կենսական շահեր, կապված էներգետիկ պահանջների բավարարման հետ, ինչը առնչվում է Կենտրոնական Ասիայից Հարավային Կովկասի տարածքով էներգոռեսուրսների տարանցման հետ»,- նշեց բանախոսը՝ հավելելով, որ այդ շահերն իրականացնելու համար ԵՄ-ը տարածաշրջանում խաղաղության կարիք ունի:
Գնահատելով ներկայիս իրավիճակը Հարավային Կովկասում՝ Ն. Գալստյանը նշեց, որ ԵՄ վերաբերմունքը Ադրբեջանի նկատմամբ ամեն դեպքում ավելի մեղմ է, քանի որ Ադրբեջանը հանդիսանում է մատակարար երկիր, հետագայում նաև դառնալու է տարանցիկ երկիր ԵՄ-ի համար:
«ԵՄ-ի ուղղակի ներգրավվածությունը ղարաբաղյան կարգավորման գործում դեռևս չի նախատեսվում, դրանք ուղղակի խոսակցություններ են, սակայն ԵՄ-ը կարող է դրականորեն ազդել հակամարտության կարգավորման վրա, դա կարող է լինել կոնֆլիկտային տարածքում տարբեր տնտեսական ծրագրերի իրականացման, ինչպես նաև հակամարտող կողմերի հասարակությունների միջև փոխվստահության մթնոլորտի ստեղծման տեսքով»,- ընդգծեց քաղաքագետը:
Նա նաև հույս հայտնեց, որ ԵՄ-ը կուժեղացնի ճմշումը ադրբեջանական իշխանություների վրա, որպեսզի Ադրբեջանի հասարակության մեջ հնարավոր լինի հայերի և ՀՀ-ի հանդեպ ստեղծել դրական վերաբերմունք:
/Times.am/
| 
