Կարևոր չէ, թե որ երկիրը կճանաչի Հայոց ցեղասպանությունը, կարևորն այն է, որ Թուրքիան ճանաչի: Այս մասին «Սիվիլիթաս» հիմնադրամի կողմից կազմակերպված քննարկման ժամանակ ասաց ՀՀ-ում ԱՄՆ նախկին դեսպան Ջոն Էվանսը: «Կարևորն այն է, որ Թուրքիան հասկանա, որ լավ բան չի արել իր երկրի ժողովրդի մի հատվածի հետ: Կարևոր է, որ Թուրքիան հասկանա, ընդունի ու շտկի իր սխալը»,- ասաց նա:
Նախկին դեսպանը նաև նշեց, որ Թուրքիան ԱՄՆ-ի հետ լավ հարաբերություններ ունի: Թուրքիան 72 միլիոնանց երկիր է, տնտեսապես հարուստ է ի տարբերություն Հայաստանի, բայց «չափսը չէ, որ ամեն ինչ որոշում է: Զգոն թզուկը քնած հսկայից ավելի ուժեղ է»:
Պատասխանելով այն հարցին, թե ինչո՞ւ իրեն ազատեցին ՀՀ-ում ԱՄՆ դեսպանի պաշտոնից, նա ասաց. «Երբ, որ ես 2005 թվականին ճշմարտացի խոսեցի պատմության մասին, գիտեի, որ բացասական հետևանքներ կունենա, բայց չգիտեի` գլուխս կկտրեն, թե ձեռքիս կտան: Դրանից հետո ինձ անմիջապես չհանեցին, այլ 18 ամիս անց Բուշը հերթական նշանակումն արեց Հայաստանում դեսպանի պաշտոնում ու ես հեռացա: Ես այժմ թոշակ էլ եմ ստանում»:
/Panorama.am/
|