Հաջորդ շաբաթը կոչվելու է ՄԱԿ-ի, քանի որ հոկտեմբերի 24-ը ՄԱԿ-ի օրն է: Այդ շաբաթվա ընթացքում Երևանում և ՀՀ մարզերում իրականացվելու են մի շարք միջոցառումներ: Այս մասին ասուլիսում ասաց Հայաստանում ՄԱԿ-ի մշտական համակարգող, ՄԱԶԾ մշտական ներկայացուցիչ Դաֆինա Գերչևան:
Նշենք, որ ՄԱԿ-ի կանոնադրությունն ստորագրվել է 1945 թ-ի հունիսի 26-ին, ուժի մեջ է մտել հոկտեմբերի 24-ին, որը և նշվում է որպես ՄԱԿ-ի օր: 1992 թ-ի մարտի 2-ից ՄԱԿ-ի անդամ է նաև Հայաստանի Հանրապետությունը: Դ. Գերչևան ասաց, որ միջոցառումների մեկնարկը տրվելու է հենց հոկտեմբերի 24-ին` Երևանում ՄԱԿ-ի շենքի վրա տեղադրվելու են արևային հոսանքի աղբյուր հանդիսացող պանելներ (Հայաստանում ՄԱԿ-ի գրասենյակն առաջինն է աշխարհում, որի շենքի վրա տեղադրվում են արևային պանելներ), որը հետապնդում է երկու նպատակ` կրճատել ջերմոցային գազերի արտանետումները և երաշխավորել, որ ՄԱԿ-ի գործունեությունն ավելի էներգախնայող բնույթ ունի:
Նա նաև հայտնեց, որ շաբաթվա շրջանակում անցկացվելու է մրցանակաբաշխություն, որի ժամանակ ՄԱԿ-ի գործունեությունը լուսաբանելու համար երեք լրագրող ստանալու են մրցանակներ: Լինելու է նաև հանդիպումներ տարբեր բուհերի ուսանողների հետ: ՄԱԿ-ի օրվան նվիրված միջոցառումները հատուկ կարգախոս չունեն, բայց, ըստ Հայաստանում ՄԱԿ-ի մշտական համակարգողի, ՄԱԿ-ի բարեփոխումների ընդհանուր համատեսքով` «ավելին քչով»-ն է` այսինքն հնարավորին չափ արդյունավետ գործունեություն` համեստ միջոցներով:
/Panorama.am/
|