Մայր Աթոռ Սուրբ Էջմիածնում, Ն.Ս.Օ.Տ.Տ Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունել է Սիդնեյի (Ավստրալիա) Համազգային «Արշակ և Սոֆի Գոլստըն» ճեմարանի սաներին և իր օրհնությունն ու բարեմաղթանքները է բերել նրանց: Համազգայինի 10-րդ և 11-րդ դասարանների 35 սաները հայրենիք են այցելել ճեմարանի 25-ամյակի առիթով: Այս մասին հայտնում են Մայր Աթոռի տեղեկատվական համակարգից:
Վեհափառ Հայրապետը ողջունելի և գովելի է նկատել այլևս ձևավորված այն ավանդույթը, որ դպրոցի սաներն այցելում են Հայաստան: «Վստահ եմ, որ ձեր այս այցելությունն իր դրոշմը պիտի թողնի ձեր հոգիներում և դուք, առավել զորացած հայկական զգացումների մեջ, հպարտ ձեր ազգային ինքնությամբ` պիտի վերադառնաք առավել նախանձախնդրորեն ձեր ուսումը շարունակելու, արժեքավոր զավակներ լինելու և ձեր կարևոր մասնակցությունը բերելու հայ կյանքի առաջընթացին», - իր խոսքում նշել է Ամենայն Հայոց Կաթողիկոսը: Վեհափառ Հայրապետը հորդորել է երիտասարդներին ամուր և հաստատուն պահել սերը Հայոց Եկեղեցու և հայ ինքնության նկատմամբ, ծառայություններ ստանձնել հայ կյանքից ներս՝ դրսևորելով ստեղծագործական ոգի և նախանձախնդրություն:
Նորին Սրբությունն իր գնահատանքն է բերել նաև Համազգային ճեմարանի մանկավարժներին և տնօրինությանը, ովքեր նախանձախնդիր են, որ իրենց զավակները կրթվեն հայի ոգով և ազգային գիտակցությամբ: Համայն հայության նվիրական կենտրոնում նման ջերմ ընդունելության համար Վեհափառ Հայրապետին ճեմարանականների անունից իր շնորհակալությունն ու երախտագիտությունը է հայտնել ճեմարանի հայոց լեզվի ուսուցչուհի Բեթի Մարաշլյանը: Այնուհետև Նորին Սրբությունը պատասխանել է սաներին հետաքրքրող հարցերին, որոնք առնչվում էին Հայ Եկեղեցու ներկայիս կյանքին ու մեր ժողովրդի մեջ նրա ստանձնած առաքելությանը:
/panorama.am/
|